Norsk Barneblad » snill

Er det uhøfleg å gløyme smileteikn? ;-)

Nana — Tue, 19 Oct 2010 11:11:28 +0000

I Aftenposten les vi idag at det er uhøfleg å gløyme smileteikn i tekstmeldingar. «Ok, ser deg i kveld.» eller «Ok, då ser eg deg i kveld .» Kva melding trur du er skriven av ei jente? Jenter sine tekstmeldingar blir gjerne avslutta med eit smilefjes, medan gutane gjerne skriv korte meldingar utan smilefjes. Jenter skriv fleire og lengre tekstmeldingar enn gutane. Jentene bruker også fleire smilefjes enn gutane. Ofte så synest jentene at gutane sine meldingar er for korte og somme gongar rett og slett uhøflege. Dette er fordi gutane brukar få ord og ingen smilefjes. Gutar kan godt svare på ei melding med eitt ord som ja eller nei eller ok. Mange jenter synes dette er både uhøfleg, kort og uinteressant. Er det slik i din vennegjeng også? Skriv gjerne eit innlegg til ordskifte om dette. Brukar gutar for få ord? Er det viktig med smilefjes? Er det slik at mange gutar synes at smilefjes er tøvete? Kva tenker DU?

Norsk Barneblad for glade og opplyste barn – på nynorsk!

Georg hatar skolen…

Nana — Fri, 14 May 2010 09:33:02 +0000

Georg hatar skolen. Han er dårlegast i alt og har dumpa to gongar. No er han tretten og utvist frå sjette klasse. Ja, skolen vil ikkje ha han tilbake i det heile tatt. Til og med bestefar Leon som alltid har vore bestevennen hans, kjeftar og seier at han må ta seg saman. Ta seg saman? Korleis kan han ta seg saman? Georg kan berre ikkje noko for at han ikkje forstår seg på skolearbeid. Berre i første klassen hadde han ei lærarinne som skjøna at Georg kan lage alt mulig med hendene sine. Georg er skikkeleg flink med hendene sine. Men skolearbeid og lekser går berre ikkje. Og no er det skikkeleg ille og foreldra kjeftar og kranglar så Georg får sår i øyro. Og finst det ein skole som vil ta inn Georg – midt i skoleåret? Alle er fortvila over Georg. Kan livet bli verre? tenker han.

Veldig flott bok av den franske forfattaren Anna Gavalda.

Omsett frå fransk til bokmål av Tove Bakke.

Boka kan lånast på biblioteket eller kjøpast i ein bokhandel.

Norsk Barneblad for glade og opplyste barn – på nynorsk!

Er DU høfleg?

Nana — Wed, 25 Nov 2009 18:01:54 +0000

Er du høfleg? Mange vaksne er ikkje særleg høflege, verken mot barn eller andre vaksne. Kvar dag tek eg t-bana til og frå Norsk Barneblad, og nesten kvar dag legg eg merke til uhøfleg framferd. På t-bana til byen om morgonen er det ofte svært fullt, men enkelte passasjerar brøyter seg fram utan å ta omsyn til andre. Både gravide og eldre blir dytta hit og dit, og nesten ingen gidd å tilby dei sitjeplassen sin. Er dette berre tankeløyse? Når eg går inn i ein butikk, reknar eg det som god skikk at dei som jobbar der, helsar på kunden som kjem. Om dei ikkje seier hei, så ventar eg eit lite smil i det minste. Men ofte held dei berre på med sitt, og kastar knapt eit blikk på meg. Er det også tankeløyse?

No er det snart berre i utmarka og på fjellet at folk som ikkje kjenner kvarandre, likevel smiler og helsar. Tenk så mykje hyggelegare alt hadde vore om alle var høflege og blide mot kvarandre. Eg merkar eg blir skikkeleg glad når eg møter folk som er høflege og vennlege mot framande. Det er vel ikkje så vanskeleg å seie hei, takk eller unnskyld når det trengst? Og vaksne folk må ikkje tru at du som veks opp i dag, lærer å vere høfleg når så mange vaksne rundt deg er slike dårlege eksempel. Men ein ting har eg oppdaga – det er kjempesmart å vere blid og høfleg. Eg får masse gratis godvilje nettopp fordi eg kan seie hei, takk og unnskyld når det trengst. Med eit smil i tillegg så går det meste bra. Det er eit godt tips for eit godt liv!

Nana

Norsk Barneblad for glade og opplyste barn – på nynorsk!