Norsk Barneblad » mobbing

Gjer du ulovlege ting på Internett?

Nana — Tue, 25 May 2010 13:28:01 +0000

Det er ulovleg å laste ned og kopiere musikk, filmar og spel med opphavsrett, frå Internett. Likevel veit berre annakvart barn dette. Visste DU det? Mange barn og unge trur at alt dei finn på Internett er til fri bruk, men slik er det jo ikkje. At du KAN laste ned ein song frå nettet betyr ikkje at det er GRATIS å gjere det.

Norske barn gjer faktisk mykje ulovleg på nettet. Vi snakkar om tradisjonell hacking, om mobbing, dei lyg om andre, gamblar og slår ned folk for så å legge ut video av det. Ja 3 av 10 norsk barn trur det er lov å mobbe andre på nettet. Dette fortel Elisabeth Staksrud som er stipendiat ved Universitet i Oslo og som skriv doktorgrads-oppgåve om barn og unge i sosiale mediar.

Dei fleste unge veit heller ikkje at dei ikkje kan ta eit bilete av andre og legge det ut på nettet eller dele det med andre, utan å be om løyve først. Og er eit bilete først kome ut på nettet er det så godt som umulig å få det fjerna. Så eit «feil» foto på facebook kan forfølgje ein stakkar i årevis.

Mange mobbesaker startar på nettet og blir til straffbare handlingar ute på gata. I landet vårt er det no ei auke i straffesaker som er knytt til brot på lova om personvern og mobbesaker.

Dei fleste foreldre anar ikkje kva ungane deira driv med på nettet og ungane seier heller ingenting. 14 % av dei unge fortel at dei mobbar andre på nettet, men berre 1 % av foreldra trur at deira barn kan gjere noko slikt.

Norsk Barneblad for glade og opplyste barn – på nynorsk!

Georg hatar skolen…

Nana — Fri, 14 May 2010 09:33:02 +0000

Georg hatar skolen. Han er dårlegast i alt og har dumpa to gongar. No er han tretten og utvist frå sjette klasse. Ja, skolen vil ikkje ha han tilbake i det heile tatt. Til og med bestefar Leon som alltid har vore bestevennen hans, kjeftar og seier at han må ta seg saman. Ta seg saman? Korleis kan han ta seg saman? Georg kan berre ikkje noko for at han ikkje forstår seg på skolearbeid. Berre i første klassen hadde han ei lærarinne som skjøna at Georg kan lage alt mulig med hendene sine. Georg er skikkeleg flink med hendene sine. Men skolearbeid og lekser går berre ikkje. Og no er det skikkeleg ille og foreldra kjeftar og kranglar så Georg får sår i øyro. Og finst det ein skole som vil ta inn Georg – midt i skoleåret? Alle er fortvila over Georg. Kan livet bli verre? tenker han.

Veldig flott bok av den franske forfattaren Anna Gavalda.

Omsett frå fransk til bokmål av Tove Bakke.

Boka kan lånast på biblioteket eller kjøpast i ein bokhandel.

Norsk Barneblad for glade og opplyste barn – på nynorsk!

Mobbing på nettet!

Nana — Thu, 15 Apr 2010 12:01:32 +0000

Dersom du har opplevd at andre har oppretta falske profilar på deg, til dømes på Facebook eller i Nettby, kan det vere vanskeleg å vite korleis desse kan bli sletta. Du kan også få hjelp til å slette ting du sjølv har lagt ut, men angrar på. Eller kanskje har nokon lagt ut bilete eller anna av deg som du ikkje vil at andre skal sjå. No har Datatilsynet laga ei side som heiter http://www.slettmeg.no og her kan du finne ut kva du skal gjere for å få sletta slike ting. Sida kan ikkje slette noko for deg, men du kan finne informasjon om korleis du går fram. Du kan også fylle ut eit skjema å sende inn frå sida, for å få meir og betre hjelp.

Norsk Barneblad for glade og opplyste barn – på nynorsk!

Dei kallar meg berre Hugo

Nana — Mon, 19 Oct 2009 11:47:36 +0000

Hugo er ein gut på 11 år. Han og Ramn er bestekameratar heilt til alt skjer. Dei blir bitre fiendar og alt startar med ei gammal bok frå Frankrike. ”Ringeren i Notre Dame” av Victor Hugo. Har Hugo namnet sitt etter denne forfattaren som har vore daud i fleire mannsaldrar? I klassen til Hugo går det ei jente som alle kallar for Smæra. No finn Hugo ut at ho heiter Esmeralda. Ho har same namnet som den vakre sigøynarjenta i boka. Kvifor? Er det ein samanhang mellom Hugo og Esmeralda? Er det berre eit pussig samantreff eller er det noko meir?

Takka vere namnet sitt finn Hugo ut mykje han ikkje ante noko om. Nye venner får han også og ein rad uventa hendingar tek plass i livet hans. Ingenting kan bli som før og kva med venskapen til Ramn? Kan han reddast?

Dette er første boka av fire om guten Hugo. Boka er både spennande og morosam. Du kan kjøpe ho i bokhandelen eller låne ho på biblioteket. Du blir ikkje skuffa.

”Ringeren i Notre Dame” av Victor Hugo finst også i biblioteket om du har lyst til å lese om sigøynarjenta Esmeralda og den forkrøpla og krylrygga ringaren Quasimodo. Boka er rekna for å vere ein klassikar – ei bok som aldri blir for gammal og som stadige nye unge lesarar finn glede og grøss i. Prøv du også!

Rakel Helmsdal er fødd 1966, og bur på Færøyane. Dei kallar meg berre Hugo er den første av fire bøker om Hugo.

I tillegg til å skrive bøker arbeider Rakel òg med teater, ulike kulturprosjekt for unge, og som gartnar, bibliotekar og grafikar. Ho held også kurs i kreativ skriving. Rakel budde fleire år i Frankrike før ho igjen busette seg heime på Færøyane.

Rakel kjem på Noregsbesøk i høve Faltiriltu, den nynorske barnebokfestivalen på Stord, første veka i november i år.

Kapabel forlag i Bergen har gitt ut Rakel Helmsdal si bok om Hugo, den første i ein serie med i alt fire bøker. Boka er omsett frå færøysk til nynorsk av Lars Moa.

Dette er ein nettartikkel og er ikkje trykt i Norsk Barneblad.

Norsk Barneblad for glade og opplyste barn – på nynorsk!