Norsk Barneblad » miljø

Ikkje drep småfuglane!

Nana — Wed, 01 Feb 2012 12:18:30 +0000

Kast aldri tyggegummien din ute på gata eller i naturen! Han kan ta livet av småfuglane. Vinterstid er småfuglane på stadig leit etter mat. Lukta frå tyggegummien gjer at dei trur at dei har funne ein godbit. Men sanninga er at dei har funne ei dødsfelle. Så snart fuglane får tyggegummi i nebbet sitt går det galt. Tyggegummien limer ihop nebbet. Fuglen har ingen måte å få losna det på. Med ihoplimt nebb blir det ikkje verken vått eller tørt på vesle fuglen. Det tek ikkje lang tid før fuglen har svolte ihel. Så difor, kast aldri tyggegummi i naturen!

Norsk Barneblad for dyreglade barn – på nynorsk!

Men dei drukna ikkje!

Nana — Wed, 31 Aug 2011 12:47:20 +0000

Forskarar skulle finne ut om edderkoppar som lever i område med stadige flaumar, toler å vere lenger under vatn enn same typen edderkoppar som lever i tørre område. Edderkoppane blei lagde under vatn, og forskarane sjekka kor lenge dei levde. Dei børsta forsiktig borti dei med ein liten kost for å sjå etter teikn til liv. Edderkoppane som kom frå flaumområde, levde i 28 timar under vatn. Dei andre klarte seg i 24 timar. Dette er jo veldig mange timar under vatn og imponerande nok i seg sjølv. Forskarane plukka opp dei drukna edderkoppane, og la dei til tørk. Men då skjedde det noko veldig rart som forundra alle. Etter eit par timars tid vakna alle edderkoppane opp og styrte på som før. Ja, som om ingenting skulle ha hendt. Drukna var dei så visst ikkje. Forskarane trur no at edderkoppane legg seg sjølv i koma og på den måten kan overleve under vatn. Så no treng du kanskje ikkje ha dårleg samvit for dei edderkoppane du skylte ned i vasken eller ned i do. Sjansen er til stades for at dei vakna til live så snart dei hadde tørt land under føtene igjen. No lurer forskarane på kor mange andre insekt som kan gjere det same trikset. Enno er det mykje her på jorda vi ikkje veit nokon ting om. Tida for under er ikkje forbi.

Edderkoppen på illustrasjonen har ingenting med forsøket å gjere!

Kjelde: National Geographics

Brødristar eller hai?

Nana — Wed, 04 May 2011 10:57:11 +0000

Kva trur du er mest farleg? Ein hai eller ein brødristar? I 2009 omkom 791 personar i USA av brødristarar, medan 9 personar blei drept av hai det same året. Men kva er vi mest redde for? Haien så klart… Men vi burde altså vere reddare for å bruke brødristaren vår enn for at det skal bli ein haisommar. Men det er vi jo ikkje. Og kva er poenget mitt med dette? Berre å minne deg om at ting ikkje alltid er slik du automatisk tenker og trur… Brødristar eller hai altså!

Norsk Barneblad for snartenkte barn – på nynorsk

Eit slit å lage leiker!

Nana — Thu, 31 Mar 2011 10:05:06 +0000

Sjølv om det er lenge til jul kan det vere greitt å vite at verkstaden til nissen ligg i Kina. Nærare bestemt i Guangzhou, som er hovudstaden i provinsen Guangdong. Her er det åtte tusen leiketyfabrikkar. Desse fabrikkane lagar 75 % av alle leiker som blir selde over heile verda.

Guangzhou heitte Canton før, og ligg i Sør-Kina. Det er den viktigaste handelsbyen i heile Sør-Kina. Guangzhou ligg vakkert til ved Perle-elva og har om lag 10 millionar innbyggjarar. Folk her snakkar kantonesisk, ei form for kinesisk som er vanleg over heile Sør-Kina. På den kaldaste tida i januar er det 15 grader her, og i juni er det høgsommar med ein snitt-temperatur på rundt 28 grader. Både i juni og juli regnar det ein del her.

Og i Guangzhou ligg altså verkstaden til nissen. Gjennom heile året er det travle tider i leiketyfabrikkane. For barn får gåver gjennom heile året, ikkje berre til jul. Og alle, sikkert du også, ønskjer seg helst harde pakkar. Svært mange av dei harde pakkane du får, er laga ved hjelp av strevsamt arbeid til langt på natt.

Gløym alt du har høyrt eller tenkt om kor koseleg det må vere å lage leiker. Det er eit blodslit. Ein vanleg arbeidsdag er på 12 timar! Men det er heilt vanleg at eit skift varer opptil 17 til 18 timar! Dersom ein arbeidar ikkje vil jobbe så mykje overtid, så får han eller ho rett og slett sparken. Månadsløna til ein fabrikkarbeidar er om lag 1000 kroner. Folk i dette området i Kina er kjende for å vere hardt arbeidande og flittige.

I Kina har ikkje arbeidarane lov til å gå saman for å protestere mot uretten i arbeidslivet. Gjer dei det, så blir dei sparka og mistar arbeidet sitt. Lovene i Kina som skal passe på rettane til arbeidarane, er ikkje så verst, men dei fleste arbeidarane kjenner ikkje rettane sine. Leiinga på fabrikkane bryr seg ikkje om anna enn å tene mest muleg pengar, og bryt dei kinesiske lovene gong på gong.

Dersom forholda skal betrast i fabrikkane, må vi slutte å presse ned prisen på arbeidet med å lage leiker. Vesten må ta sin del av ansvaret for å gjere arbeidsdagen leveleg for kinesiske arbeidarar. Dei rike selskapa frå Vesten som krev gode arbeidsforhold i fabrikkane som leverer leikene deira, må samstundes vere viljuge til å betale betre. Dei kan ikkje både krevje betre løn for arbeidarane og lågare pris for leikeproduksjonen.

Kor mange av dine leiker kjem frå Kina? Leiker som blir selde her i landet, kjem svært ofte frå Kina. Både Brio, Top-Toy, Toys R Us, Edwis, Ringo og leiker for butikkar som Coop og ICA er laga der.

Norsk Barneblad for smarte barn – på nynorsk!

Akerselva er daud!

Nana — Wed, 09 Mar 2011 11:54:25 +0000

I løpet av 20 år har Oslo Kommune brukt meir enn 200 millionar kroner på å stenge gamle kloakkrør og å reinse Akerselva. No var elva endeleg frisk og fin og full av fisk. Men på berre ei natt er elva på nytt daud og tom for alt liv.

Tysdag 1. mars i år – langt nedi og langt inni fjellet ved Oset Vannrensingsanlegg sprekk eit rør og ingen oppdagar ulukka før neste morgon. Men då er alt liv i Akerselva allereie borte. 6 000 liter ufortynna klor har rent ut i elva i løpet av desse nattestimane. Ekspertane slår no fast at Akerselva er øydelagt. Det kan ta heile 8 år før elva på nytt er full av fisk og anna liv. Dette er djupt tragisk og svært fortvilande for Vann- og avløpsetaten i Oslo som er ansvarlege for røret som sprakk. Det er veldig trist for direktøren som har brukt mange år nettopp på å reinse Akerselva og gjere ho til ei god fiskeelv. No seier han at Vann- og avløpsetaten vil gjere alt i deira makt for å sikre seg mot slike ulukker i framtida. I tillegg vil dei også gjere det dei kan for å gjer Akerselva leveleg igjen. Slikt må ikkje hende igjen!

Norsk Barneblad for glade og opplyste barn – på nynorsk!

Eit stinkande Europa!

Nana — Thu, 13 Jan 2011 13:21:18 +0000

Svartedauden tok livet av mellom 25 og 50 millionar menneske i Europa og legane meinte at det var vatnet sin feil. Smitten blei altså overført i vatnet. Ojsan, tenkte folk då og slutta heilt å vaske seg. Og slik heldt det fram i mange hundre år. Folk stinka, ja heile Europa stinka. Rikfolk kunne jo skifte klede ein gong i blant og dynke seg med parfymar, men fattigfolket hadde verken nye klede eller parfymar å gøyme sveittelukta si i. Solkongen, Ludvig 14. blei sett på som svært rein. Han bytte nemleg til ny skjorte tre gongar om dagen. Det var mykje tryggare enn å vaske seg.

Den kongelege legen Ambroise Paré sa i 1568 at ein burde forby dampbad fordi det gjorde huda blaut og fekk porane til å opne seg og difor gjorde det lett for pestbefengte dunstar å trenge inn i kroppen og raskt føre til dauden. Dersom ein let vere å vaske seg ville skiten tette porane og sørge for at sjukdomen ikkje klarte å trenge inn i kroppen. Skit som førebyggande medisin altså.

Såpe var svært så sjeldant heilt fram til 1800-talet. Men sjølv om folk i Europa ikkje vaska seg, så auka folketalet jamt og trutt. Litt sveittelukt stoppa ingen.

I 1596 fann Sir John Harrington opp eit slags vatnklosett, men blei så grundig pepen ut at han droppa heile oppfinninga. Det tok 200 år til før nokon torte å finne på noko slikt igjen.

Norsk Barneblad for glade og opplyste barn – på nynorsk!

Utrygge reservat

Nana — Tue, 30 Nov 2010 11:35:32 +0000

I Kenya er det heile 49 nasjonalparkar som til saman dekker 8 % av heile landet. I Kenya bur det no over 40 millionar menneske. Reservata eller nasjonalparkane er sjølvsagt oppretta for å ta vare på det ville dyrelivet i landet. Kenya har store inntekter frå turistar som kjem nettopp for å sjå ville dyr.

For å ta vare på dei ville dyra er det forbode å bu og jakte i reservata. Men likevel viser undersøkingar at dyra ikkje er trygge verken i eller utanfor reservata. Mange av dyra er såkalla migrerande dyr. Det betyr at dei vandrar på lange turar i løpet av eit år. Noko av problemet er at dyra vandrar utanfor reservatet også. Dyra veit jo ikkje kva som er reservat, og kva som ikkje er det. Dyra berre gjer slik dei alltid har gjort og går dit dei alltid har gått.

40 millionar menneske må sjølvsagt bu ein stad. I reservata er det ikkje lov å busetje seg, men rett utanfor er det jo lov. Og dermed veks det opp busetjingar rett utanfor grensene til reservata. Du kan sjølv tenkje deg at det ikkje er lett verken for dyra som er på vandring, eller for folket som bur der. Dette blir det trøbbel av. Og rett innafor på reservatet er det lett å få skote eit dyr om familien din svelt. Eit dyr frå eller til, tenkjer dei vel. Men til saman blir det ikkje så bra for dyrelivet.

Ein skikkeleg innsats er gjord for å auke talet på elefantar i Kenya. No er det så mange elefantar at det også er eit problem. Elefantane trakkar ned graset og øydelegg skogen som antiloper og andre hjortedyr skal gøyme seg i og ete av. Dei som bur i landsbyane nær reservata der elefantane likar å vere, er heller ikkje så lukkelege over å ha slike store dyr som naboar. For ein elefant berre går dit han vil og et det han har lyst på.

For Kenya er det veldig viktig at alle dei ville dyra har det bra, og at turistar framleis kan kome for å sjå dei. Turistar på safari er ei av dei største inntektskjeldene for landet. I dei siste 30 åra har 40 %, altså nesten halvparten, av dei ville dyra forsvunne. Dette er ikkje bra, verken for folk eller dyr.

Norsk Barneblad for glade og opplyste barn – på nynorsk!

Treng vi pelskåper?

Nana — Wed, 17 Nov 2010 12:59:15 +0000

I det siste har vi lese mykje trist om pelsdyr som har det vondt. I avisene har vi sett bilete av dyr med stygge sår og tronge bur. I alle tider har menneske brukt pels til å halde seg varme i kalde vintrar. Men i gamle gamle dagar levde desse dyra fritt og blei jakta på for pelsen sin og kanskje også for kjøtet sitt. No om dagen lever desse dyra i bur og blir avla opp for å bli flådde og sydde til varme klede for frostige menneske. At vi held husdyr til mat og anna er jo slik det er, men alle er samde i at husdyra våre må ha det bra. Difor har vi Mattilsynet som skal sjekke husdyrhald over heile landet og sjå at alle lover og reglar blir haldne og at dyra har det bra. Slik skal det jo vere i pelsdyrnæringa også, men mykje tyder på at mange av desse dyra likevel ikkje har det bra. Det er fælt å lese at dei som driv med pelsdyr seier at «litt skadar» må ein rekne med.

Kanskje er det ekstra vanskeleg å halde slike dyr innesperra i bur? Vi snakkar jo om mink og rev som begge er rovdyr og ikkje tamdyr. Og set du rovdyr i bur så blir det vel både slossing og skadar? Om pelsdyrnæringa skal vere liv laga i framtida må dei finne betre løysingar enn i dag. Dyra må ikkje lide slik som det er vist mange døme på i avisene siste tida. Om ein driv med dyr så er det ikkje rom for «litt skadar». Dyr i fangenskap skal ha eit rimeleg bra og skadefritt liv. Det er eit minste forlangande.

Norsk Barneblad for glade og opplyste barn – på nynorsk!

Kongekrabben er ute på tur!

Nana — Tue, 02 Nov 2010 10:17:14 +0000

Den kjempedigre krabben har i fleire år spreidd seg nedover langs norskekysten, og mange meiner han øydelegg for andre krabbar og dyr som lever på sjøbotnen. Kongekrabben er både stor og svolten og et det meste han finn på botnen. Han reinskar godt opp der han fer forbi. Ingen fiendar har han heller, og det er sjølvsagt ikkje bra. Men kongekrabben smakar godt og blir stadig meir populær på matborda, og godt er det. Truleg må vi passe på så dei ikkje blir for mange og øydelegg for alt anna liv langs kystlina vår.

Ei ny studie frå Varangerfjorden syner at kongekrabben reinskar havbotnen for alle andre dyr som lever der. Dei vanlege artane er redusert så mykje som 80 til 95 prosent. Dei artane som «luftar» havbotnen ved å tilføre vatn som inneheld oksygen blir borte. Det betyr at havbotnen blir forgifta av hydrogensulfid på grunn av mangelen på oksygen. Slik blir havbotnen lagt aude.

Men det er ikkje berre norskekysten som er truga av den digre krabaten. No har kongekrabben nådd kanten av Antarktis eller Sørpolen. Den globale oppvarminga gjer det muleg for mange artar å overleve i havområde som før var for kalde. Med ei til to grader varmare vatn kan mange artar finne nye område å leve i, som til dømes Antarktis. Dette er ikkje så bra. Havet rundt Antarktis har alltid fått vere i fred, nettopp fordi det er så kaldt. Her har det gjennom millionar av år utvikla seg eit heilt spesielt liv. Enno er det slik at langt, langt nede i djupet lever dyr og organismar ingen menneske har sett. Men dette kan ta slutt om kongekrabben får ture fram som no. Kongekrabben likar seg i både kaldt og svært djupt hav, og havet rundt Antarktis er fullt av god mat for slike glupske vesen. Her må noko gjerast før det er forseint.

Norsk Barneblad for glade og opplyste barn – på nynorsk!

Bli ein supersprek gamling!

Nana — Tue, 28 Sep 2010 13:23:15 +0000

Svensk forskning syner at dei som er aktive på langrenn gjennom eit langt liv er mykje sprekare som gamle enn dei som ikkje går på ski. Svenske forskarar har testa menn som er 80 år i snitt og samanlikna dei med menn på 40 til 50 år som ikkje har vore aktive på ski.

Dei gamle skiløparane har eit oksygenopptak på rundt 2,6 liter per minutt. 40 og 50 åringane låg på rundt 1, 6 liter per minutt. Det betyr at 80åringane er sprekare enn ein utrent mann på 40 til 50 år. Ojsan. Musklane til desse skigåande 80åringane er også svært så ungdommelege.

Men du skal gå mykje og langt på ski for å bli så sprek som 80åring. Likevel er det berre ein ting å seie – på med skia når vinteren kjem. I det lange løp vil det lønne seg.

Norsk Barneblad for glade og opplyste barn – på nynorsk!

Frå olje til vatn?

Nana — Fri, 10 Sep 2010 12:14:26 +0000

Snart tek oljen slutt meinar svært mange som har greie på slikt. For første gong blir det produsert meir gass enn olje på norsk sokkel. Reint vatn er eit gode som er knapt mange land i verda. Her i landet har vi mykje vatn og vi er eit av dei «våtaste» landa i heile verda. Ja, mange av oss klagar jo beint fram over alt regnet som kjem. I framtida kan det godt vere at norsk vatn blir den nye «oljen».

Akkurat no lever det 6,7 milliardar mennesker på jorda og i 2050 er vi truleg blitt til 9 milliardar. Allereie i dag veit vi at mangel på reint drikkevatn er eit stort problem for mange. Grunnvatnet synk i mange land og elvane tørkar ut. Eksport av reint drikkevatn kan bli ein stor eksportartikkel i framtida for landet vårt.

Norsk Barneblad for glade og opplyste barn – på nynorsk!

Kanskje dette blir din bil om nokre år?

Nana — Tue, 24 Aug 2010 11:06:44 +0000

Kias nye elektriske miljøbil, Pop, ser ganske kul ut. Han ser verkeleg ut som ein bil frå framtida. Pop er 3 meter lang og skal ha plass til 3 personar. Pop skal visast for første gong på bilmessa i Paris i oktober. Her i landet er det omlag 2 millionar bilar og av desse er det berre 3 tusen som er elbilar.

Norsk Barneblad for glade og opplyste barn – på nynorsk!

Nokon går og andre kjem…

Nana — Tue, 03 Aug 2010 12:55:18 +0000

Vi les nesten dagleg om utrudningstruga dyr og insekt. Men visste du at det enno er mange dyr og insekt som ennå ikkje er oppdaga? Berre denne sommaren har forskarar funne fleire dyr og insekt som vi ikkje visste fanst. Utanfor kysten av Canada har ein til dømes funne fleire ukjente artar djupt nede på havbotnen. Spesielt i dei djupe hava veit vi lite om kva som lever. Her er to «nye» artar frå havet utan for Canada. Ein kjempesøt lilla blekksprut som forskarane tvilar på at dei har sett før og ein vakker «sjøpenn» som har namnet sitt fordi han liknar litt på ein gammaldags fjørpenn til å dyppe i blekk.

Les meir på nettsidene til National Geographics

Norsk Barneblad for glade og opplyste barn – på nynorsk!

Vips så kom det to nyfødde pandaungar!

Nana — Thu, 24 Jun 2010 09:45:11 +0000

Dyreparken i Kristiansand har fått to nye bittesmå bebuarar. Plutseleg så var dei berre der. Klokka halv tre tysdag ettermiddag oppdaga ein dyrepassar at den raude pandahoa, som dei akkurat hadde fått frå København, ikkje lenger var aleine. To ørsmå byltar låg tett inntil ho. Dyrepassaren skjøna sjølvsagt med ein gong at pandahoa hadde fått kvelpar. To små blinde nøster.

Mor deira er ein raud panda frå Himalaya som er utrudningstruga og difor er dette ekstra gledeleg. Ein panda føder så bittesmå ungar at det er vanskeleg å sjå om ei hoe er gravid eller ikkje. No følgjer dyrepassaren nøye på at pandamora passar godt på dei nyfødde små. Held dei varme og gir dei nok mjølk. Sidan dei er så bittesmå og heilt blinde er det veldig viktig at mor klarer å ta godt vare på dei den første tida. Pandaungar er nemleg heilt hjelpelause, ja akkurat som vi er når vi er spebarn. Men fram til no ser det ut til at den unge mora er ei skikkeleg flink mor.

Norsk Barneblad gratulerer vesle pandamor og ønskjer henne og dei to små nøsta hennar ein retteleg god og varm sommar! Måtte dei to små vekse til og trivast.

Foto Ole Martin Buene/Dyrparken

Norsk Barneblad for glade og opplyste barn – på nynorsk!

Obsession – ein parfyme for jaguarar

Nana — Wed, 09 Jun 2010 13:10:00 +0000

Moteskaparen Calvin Klein er kjent for parfymen Obsession som mange damer over heile verda brukar. Vi damer tek jo på litt parfyme for å dufte ekstra godt og slik tiltrekke oss menn, men det vi ikkje visste er at jaguarar også likar Obsession. I Guatemala har forskarar eksperimentert med mange ulike lukter for å lokke jaguarane fram frå jungelen og til å stå stille lenge nok til å kunne fotografere dei. Dette er viktig for å vite kor mange jaguarar som lever i ulike områder. No har forskarane funne den rette dufta. Nemleg parfymen til Calvin Klein, Obsession. Så til alle unge damer som har tenkt seg inn i jungelen der dei store kattedyra held til, tenk deg om før du brukar Obsession. På norsk tyder obsession fiks ide eller tvangstanke på norsk.

Norsk Barneblad for glade og opplyste barn – på nynorsk!

EXPO 2010

Nana — Thu, 29 Apr 2010 12:01:46 +0000

Verdsutstillinga i Shanghai

1. mai opnar verdsutstillinga som er den største nokonsinne, i Shanghai. I 184 dagar vil utstillinga vare og mellom 70 og 100 millionar menneske er venta å kome innom. Heile 242 land og organisasjonar er påmelde som utstillarar.

EXPO 2010 har som tema ”Betre byar, betre liv”. Byliv er for første gong tema for ei verdsutstilling. Norske byar er få og små, men dei har noko til felles. Det er vere seg kyst og hav, fjell eller skog. Menneska i dei norske byane bur nær natur, i og rundt byen. På EXPO 2010 har Noreg kalla sin utstillings-paviljong ”Norway. Powered By Nature”. Noreg vil vise korleis naturen er ei kjelde til betre trivsel i byane, gjennom opplevingar, inspirasjon og reinare energi. Bileta viser korleis ein tenker seg den norske pavilijongen og utstillinga inne i han. Og til venstre ser vi frå bygginga av pavilijongen. Truleg vil minst 3 millionar menneske sjå den norske utstillinga.

Norsk Barneblad for glade og opplyste barn – på nynorsk!

Hus av jord, ølboksar og gamle bildekk!

Nana — Wed, 07 Apr 2010 11:47:50 +0000

I det tørre landskapet I New Mexico, USA, finn vi ein heil liten by som er bygd av jord, ølboksar og gamle bildekk. Desse husa blir kalla jord-skip eller earth ships på engelsk. Michael Reynolds heiter mannen som står bak dette som han kallar «The Greater World Community». Reynolds meinar at dette er framtida. Hus som er bygde av det vi kallar søppel. Han er utdanna arkitekt, men meinar at arkitektar i dag tenker for lite på miljøvennlege hus. Skal verda klare seg må ein tenke heilt nytt og bruke av søppelberget som finst i verda i dag. Vi må lære av naturen. I staden for å bruke materialar som forureinar kan vi heller bruke det som allereie finst, som jord, ølboksar og gamle bildekk. Eller leite mellom alt det andre anna som kan resirkulerast og brukast på nytt. Det finst ikkje søppel – berre ting som kan brukast annleis og på nytt!

I fjor var Michael Reynolds i Noreg og heldt kurs for studentane ved Bergen Arkitektskole. Han fortel at folk tvilte på om denne søppelbyggemåten kunne vere bra nok i eit kaldt land som vårt. Saman med studentane bygde han eit opphaldsrom etter jord-skip-metoden. Romet blei isolert med pappkassar frå nærbutikkane, med gamle dører, vindauge og plankar frå søppelfyllinga. Reynolds meinar at dette romet er det mest behagelege på heile arkitektskolen. Rektor for Bergen Arkitektskole, Marianne Skjulhaug, vil halde fram samarbeidet med Reynolds. Ho meinar at dette arbeidet er viktig og at ideane til Reynolds er interessante.

Så kanskje kan du i framtida velje om du vil bo i eit vanleg hus eller i eit jord-skip?

Kjelde: Dagbladet

Norsk Barneblad for glade og opplyste barn – på nynorsk!

Den nye vennen til Fantorangen?

Nana — Mon, 15 Mar 2010 11:34:29 +0000

Nei, det er det nok ikkje. Dette er ein axolotl, ein salamander frå Mexico. Utruleg søt, ikkje sant? Og det er det ikkje berre vi to som tenker. Axolotlen er populær som akvariedyr over det meste av verda. I USA er dei kjempepopulære og har eigne fanklubbar. Ja, både i Sverige og Danmark får du kjøpt dei. Men her i landet er det forbode.

I det fri finst han nesten ikkje lenger. Xochimilco-sjøen i det sentrale Mexico er einaste staden der han lever i sitt naturlege element. Ja, som vill er han utrudningstruga, men sidan han er så populær som akvarie-salamander så døyr han nok ikkje ut med det første.

Axoltlen blir brukt som forskningsdyr. Det finst fleire mutasjonar. Ja, forskarane har til og med avla fram ein som er sjølvlysande grøn. Og om det ikkje var nok så er axolotlen rekna som ein delikatesse blant enkelte folk. God som grilla seier de. Huff og huff!

Axolotlen lever til han er 10 – 15 år gammal. Han kan faktisk bli 45 cm lang. Men det vanlege er omtrent 20 til 25 cm lang.

Vil du vite meir så kan du lese på http://no.wikipedia.org/wiki/Axolotl

Norsk Barneblad for glade og opplyste barn – på nynorsk!

Songsvaner har høgderekorden!

Nana — Mon, 08 Mar 2010 09:53:46 +0000

Songsvaner liker å flyge høgt. Ein pilot i eit fly over Ytre Hebridane såg ein gong songsvaner på heile 8 230 meters høgd, altså over åtte kilometer oppe i lufta. Der oppe er det rundt minus 50 grader, og lufttrykket er berre ein tredjedel av trykket ved bakken. Dette skal vere verdsrekord i høgdeflyging for fuglar.

Dette kan du lese i Norsk Barneblad denne månaden.

Men vi kom i skade for å trykke eit foto av to knoppsvaner. Det kan du sjå på den svarte kulen knoppsvanene har høgt oppe på nebbet. Ein slik svart kul har ikkje songsvanene ellers er dei like vakre begge to :-) Men her har du fire songsvaner på tur.

Takk til Sofie.

Norsk Barneblad for glade og opplyste barn – på nynorsk!

Gje mat til småfuglane!

Nana — Wed, 03 Feb 2010 12:15:02 +0000

Mange småfuglar kjempar for å overleve i kulda. Denne vinteren er ekstra hard for dei. Småfuglane er så små og lette at dei har problem med å halde kroppstemperaturen sin oppe. Og skal dei greie det treng dei nok mat. Du kan godt lage fuglematen heime på kjøkenet ditt og det treng ikkje koste så mykje.

Smelt feitt i ei panne og bland inn litt fuglefrø. Har du ikkje fuglefrø kan du også bruke brødsmular. Hell blandinga i små jogurtbeger. Sett dei i kjøleskapet over natta så blandinga stivnar skikkeleg. Dagen etter kan du legge dei på fuglebrettet eller henge dei opp. Du kan dra ein hyssing igjennom med ein knute under tjukkaste delen. Har du ein liten pinne så kan du også stikke den på tvers gjennom – slik har fuglane noko å stå på også.

Så kan du sette deg godt til rette i godstolen bak glaset og sjå kor glade alle dei fine småfuglane våre blir. Kanskje har du på lur ein kikkert eller eit kamera også…

Norsk Barneblad for glade og opplyste barn – på nynorsk!

Norske sjøfuglar døyr ut

Nana — Tue, 19 Jan 2010 12:20:31 +0000

Krykkje, lomvi, makrellterne og raudnebbterne er i ferd med å forsvinne frå kysten vår. Toppskarv, svartbak, sildemåse og lundefugl er også i fare. Dette kjem fram i ein rapport frå Fylkesmannen i Hordaland og Sogn og Fjordane. Totalt sett er sjøfuglane redusert med 70 % sidan 1995. Årsaken er ein kombinasjon av overfiske og klimaendring seier forskarane. Sjøfuglane våre lever av småfisk dei finn ved korte og raske dykk i sjøen. No må dei finne fisken djupare på grunn av overfiske av overflate-fisk eller tobis som det også blir kalla. Sjøfuglane må finne anna å ete og mange av dei klarer ikkje dette og døyr difor av svolt.

Norsk Barneblad for glade og opplyste barn – på nynorsk!

Den største katten i verda

Nana — Mon, 18 May 2009 12:48:40 +0000

Ute i naturen lever ikkje tigrar og løver i same området. Dei møtest faktisk aldri. Difor finst det sjølvsagt verken ligrar eller tigonar ute i jungelen. Ein liger er eit kattedyr som har tiger til mor og løve til far. Ein tigon har løve til mor og tiger til far.Det største kattedyret i verda er ein liger som heiter Hercules. Han er 3,70 meter høg og veg 400 kilo. Han sluker opp til 45 kilo mat på ein gong, men på ein normal dag et han 9 kilo reint kjøtt. Hercules bur i dyreparken Jungle Island i Florida og står oppført i Guinness rekordbok som det største kattedyret i verda.

Jungle Island skriv på sine heimesider at Hercules ikkje er eit resultat av planlagd avl eller kunstig inseminering. Men dette er det ikkje alle som trur på. Organisasjonen Big Cat Rescue tek kraftig til motmæle. Avling av ligrar er ikkje bra. Ligrane får ofte store helseproblem. Tigermødrene har alvorlege problem med å føde så store ungar. Ofte endar ein slik fødsel i keisarsnitt.

Big Cat Rescue ber folk la vere å besøke dyrehagar med ligrar eller tigonar. Om ingen vil betale for å sjå dei, er det heller ingen grunn for dyrehagane til å ale dei opp.

Fakta om ligrar

Ein liger er avkom av løve og tiger, avla kunstig.
Far er løve og mor er tiger.
Det motsette er ein tigon, som har løvemor og tigerfar.
Ligrar blir enormt store.
Tigonar blir ofte mindre enn tigrar.
Mange ligrar lir av sjukdomen gigantonomi, det vil seie at dei sluttar aldri å vekse.
Mange ligrar er sterile, men ikkje alle.
Den største nolevande ligeren, Hercules, er 3,70 m høg og veg 400 kg.

Norsk Barneblad for glade og opplyste barn – på nynorsk!