Norsk Barneblad » jente

Ikkje drep småfuglane!

Nana — Wed, 01 Feb 2012 12:18:30 +0000

Kast aldri tyggegummien din ute på gata eller i naturen! Han kan ta livet av småfuglane. Vinterstid er småfuglane på stadig leit etter mat. Lukta frå tyggegummien gjer at dei trur at dei har funne ein godbit. Men sanninga er at dei har funne ei dødsfelle. Så snart fuglane får tyggegummi i nebbet sitt går det galt. Tyggegummien limer ihop nebbet. Fuglen har ingen måte å få losna det på. Med ihoplimt nebb blir det ikkje verken vått eller tørt på vesle fuglen. Det tek ikkje lang tid før fuglen har svolte ihel. Så difor, kast aldri tyggegummi i naturen!

Norsk Barneblad for dyreglade barn – på nynorsk!

Auroradagbøkene – boktips til påske!

Nana — Wed, 13 Apr 2011 11:29:36 +0000

«Aldri tilfreds» og «Like sint» heiter dei to dagbøkene til den franske jenta, Aurora. Ho er ikkje fornøgd med livet sitt og fortel i klartekst i dagboka si, kva ho tenker og føler om det meste. Og det er ikkje lite.

I den første boka, «Aldri tilfreds» blir vi kjent med Aurora. For det meste så synest ho at livet er forferdeleg kjedeleg, søstrene er irriterande, faren er teit og bestemora er for nysgjerrig. Læraren hennar er håplaus og det einaste oppmuntrande ho kan komme på, er den smellvakre guten ho ikkje ein gong veit namnet på. Aurora er 14 år og ho er ei krysning mellom Nemi og Brigdet Jones. Dette er morosam lesnad. Ja, så gøy er det at vi måtte lese bok nummer to i same slengen.

I bok nummer to, » Like sint», held Aurora fram med klagene sine. Ja ho er sanneleg minst like sint som i første bok. No har ho gjort seg så upopulær i heimen sin at foreldra må ha ei pause frå henne. Aurora må bu hos besteforeldra sine og ho tenker stadig på om ikkje ho berre skal stikke av frå heile livet sitt. Men det er jo lettare tenkt enn gjort. Bestevenninna Lola gjer ting både betre og verre for Aurora. Nei, no vil vi ikkje seie meir. Les sjølv og kos deg med det strevsame livet til Aurora på 14 år.

Bøkene er skrivne av Marie Desplechin og omsett frå fransk av Tove Bakke. Begge bøkene er komne ut på Det Norske Samlaget og er å finne i bokhandelen eller på biblioteket.

Norsk Barneblad for leseglade barn – på nynorsk!

Saiko – spennande ungdomsbok

Nana — Fri, 08 Apr 2011 11:29:27 +0000

Simon og Ella møtest under greinene på heggen, alt er søtt og sommar og nesten eit kyss. Det er denne sommaren alt det gode må skje. Til hausten skal Ella gå siste året på ungdomskulen og ho og venninnene hennar er bra lei av den vesle bygda. Men dei gler seg til sommaren. Ella har ikkje har så lyst på sommarjobben som far hennar har fiksa. Men ho treng jo pengane. Så blir det fest. Så skjer det ting som ikkje burde skje. Mobilfoto og utpressing. Kvifor blir Steinar kalla Saiko? Sommaren blir noko heilt anna enn snill og varm.

Boka er lettlesen og veldig god. Ho er skikkeleg spennande heile vegen. Linn T. Sunne skriv godt. Så treng du ei god bok – les Saiko!

Norsk Barneblad for leseglade barn – på nynorsk!

Uglies – ei kjempebra bok!

Nana — Wed, 16 Mar 2011 12:18:22 +0000

Uglies av Scott Westerfield er veldig annleis og svært spennande bok. Uglies er den første boka i ein trilogi.

Tally blir snart 16 år og ho kan nesten ikkje vente. Om berre få veker skal ho opererast og bli vakker. Ho skal ikkje lenger vere ein stygging, men bli ei slåande vakker ung dame. Som perfekt vakker skal ho endeleg få bu i high-tech-paradiset Penby, saman med alle dei andre nyopererte modellpene ungdommane. I Penby gjeld berre ein regel: Ha det gøy frå morgon til kveld. Men venninna til Tally, Shay, vil ikkje bli operert. Shay stikk av frå heile greia, vekk frå både Styggby og Penby. Då oppdagar Tally nye og skremmande sider av pen-verda. Styresmaktene gir Tally eit val, å finne Shay eller å bli verande ein stygging for resten av livet sitt. Det vil jo ikkje Tally så ho bestemmer seg for å finne Shay. Dette valet kjem til å forandre verda til Tally – for alltid.

Uglies er ei spennande og medrivande bok. Vi i Norsk Barneblad klarte nesten ikkje å ta pause under lesinga. Eit godt boktips til alle leseglade!

Boka er omsett til bokmål av Magne Tørring og kjem ut på Schibsted Forlag.

Norsk Barneblad for dei smarte og kule – på nynorsk.

Er det uhøfleg å gløyme smileteikn? ;-)

Nana — Tue, 19 Oct 2010 11:11:28 +0000

I Aftenposten les vi idag at det er uhøfleg å gløyme smileteikn i tekstmeldingar. «Ok, ser deg i kveld.» eller «Ok, då ser eg deg i kveld .» Kva melding trur du er skriven av ei jente? Jenter sine tekstmeldingar blir gjerne avslutta med eit smilefjes, medan gutane gjerne skriv korte meldingar utan smilefjes. Jenter skriv fleire og lengre tekstmeldingar enn gutane. Jentene bruker også fleire smilefjes enn gutane. Ofte så synest jentene at gutane sine meldingar er for korte og somme gongar rett og slett uhøflege. Dette er fordi gutane brukar få ord og ingen smilefjes. Gutar kan godt svare på ei melding med eitt ord som ja eller nei eller ok. Mange jenter synes dette er både uhøfleg, kort og uinteressant. Er det slik i din vennegjeng også? Skriv gjerne eit innlegg til ordskifte om dette. Brukar gutar for få ord? Er det viktig med smilefjes? Er det slik at mange gutar synes at smilefjes er tøvete? Kva tenker DU?

Norsk Barneblad for glade og opplyste barn – på nynorsk!

Anette Sagen – først i bakken!

Nana — Tue, 02 Mar 2010 10:47:28 +0000

Vi gratulerer Anette Sagen som førstehoppar i «nye» Holmenkollbakken. Ho skal hoppe som den første og etter henne kjem 19 menn. Og slik måtte det jo bli.

Det var eit folkekrav av Anette skulle få vere den første til å prøve bakken offisielt. Ei eiga gruppe på Facebook med tusentals medlemmer har sagt sitt. Ja, i alle avstemmingar på nettet har ho heile tida hatt flest stemmer anten det var på heimesidene til Aftenposten, VG eller Nettavisa.

Norsk Barneblad gratulerer den tøffe dama og gler oss til å sjå ho sveve ned Holmenkollen. Det har ho fortent. Ingen har gjort meir for jentehopping enn Anette Sagen.

Norsk Barneblad for glade og opplyste barn – på nynorsk!

Kjedar du deg?

Nana — Mon, 07 Dec 2009 13:03:13 +0000

Då treng du ei bok – då treng du

Veslebror ser deg av Cory Doctorow

Denne romanen går føre seg i San Francisco i nær framtid, og handlar om 17-årige Marcus Yallow, ein gjennomsnittleg High School-elev, men med over gjennomsnittet datakunnskap og -interesse.

Han er ein hackar og ein rollespelnerd, ein som tullar med skolens tryggleikssystem etc. På veg til eit laivspel, blir Bay Bridge i San Francisco sprengd i lufta, og Marcus og vennene hans er på feil sted til feil tid.

Dei blir tatt inn av Departement of Homeland Security og tatt med til ein forhørsleir dei ikkje veit kvar ligg. DHS mistenker Marcus for å vere involert, fordi han har elektronisk utstyr med seg, som er er sikra og omprogrammert på eit vis berre ein hackar kan gjere det.

Norsk Barneblad for glade og opplyste barn – på nynorsk!

Boka er kjempespennande og du kan laste ho ned gratis!

Lommepengar og likestilling

Nana — Mon, 18 May 2009 13:07:16 +0000

Det lønner seg framleis å vere gut. I snitt får gutar over 30 kroner meir i vekepengar enn jentene. Og dess eldre barna er, dess større blir skilnaden. Ja, faktisk er skilnaden på heile 60 % mellom ungdommar frå 15 til 17 år.Lommepengar går til mat, godteri, underhaldning og ulike fritidsaktivitetar for både gutar og jenter. Jentene bruker også mykje pengar til klede, sminke og smykke. Gutane bruker mest pengar på data og teknologi og mindre på slike småkjøp som jentene gjer.

Det ser ut som om skilnaden mellom menns og kvinners økonomi startar allereie med lommepengane. Jenter får mindre betalt enn gutar, og det seier noko om kjønnsrollemønsteret i heile samfunnet. Arbeidet med likestilling er noko vi må jobbe med heilt frå barna er små. Det krev at foreldre er bevisste på fordeling av lommepengar mellom bror og søster.

Gutane er flinkare til å spare pengane sine til innkjøp av større ting enn jentene, som ofte brukar alt dei har, med ein gong. Det viktige her er likevel ikkje korleis pengane blir brukte, men skilnaden på utbetalingane. Er det rett at gutane, frå 15 til 17 år, har i snitt kr 1835 i månaden, medan jentene på same alder har kr 1455 til disposisjon? Det er 20 % mindre enn gutane. Samla inntekt, som er løn frå ekstrajobb, vekepengar og andre pengetilskot heimafrå, er høgare for gutar, sjølv om det er like mange jenter som har ekstrajobb.

Norsk Barneblad for glade og opplyste barn – på nynorsk!